Sunday 19 March 2017

Les cannîns et d'aut' quénîn

Familia Canidae


Les cannîns et d'aut' quénîn

Lé couoyoté couoyie ses sou,
et n'loue rein à san vaîthîn l'loup.
S'i' pliaiche ses sou à l'întéthêt,
il étha du r'tou, l'couoyoté.

Lé dîngo goudalle un nodgîn,
tchait tchu par sus tête dans l'godîn.
Les cheins tchi l'saûvîtent dé san dro
fûtent conviés à baithe par l'dîngo.

Lé heusky n'est pon bein heutheux.
I' n'peut pon sténer chutte caleu.
Trop caud! Il est pouor astitchi:
sa bollée dg'ieau est toute as'tchie.

Lé dgaqua acate, si'en cas
pouor faithe lé jacques, eune câsaque, dgia!
I' fait d'san tchian dans chutte câsaque.
Lé monde faichonnabl'ye dithent, "Qu'i' s'paque!"

Lé tchian taqu'té a ieu un r'tas:
ch'est qu'il a des taques chîn' et là.
I' s'tait scrobé à tigue dé corps
mais les taques pathaîssent coumme d'amors.

Et l'hienne pièrcheuse reste au solé
à rithe dé vaie l's aut' bêtes chinner.
Mais qu'ou sait à s'rôti la couenne,
ches annimaux lus moquent dé l'hienne.



  • couoyoté = coyote
  • dîngo = dingo
  • heusky = husky
  • dgaqua = jackal
  • tchian taqu'té = (African) painted dog
  • hienne = hyena (Assa les hiennes sont pus à co pathentées d'auve les cats, mais ch'est d'la poésie - ch'n'est pon d'la zoologie)

No comments: