Friday 18 December 2015

1913: La farce d'Noué (1)

La Nouvelle Chronique de Jersey 24/12/1913:

La farce d'Noué

Né v'la deux-trais fais que les lecteurs de la "Nouvelle" me font l'hounneur de liéthe une petite farce que la gazette imprime à Noué pour lus faithe plaisi et j'ai 'tè prié d'en êcrithe occouo une autre ch't'annèe.


Nou-z'y r'trouv'tha nos vieilles counnaissances, Dan Lêcaudey et sa Missis, qui sont, coumme chatchun l'sait, des types counnus en Jerry.


Mais deux autre caractéthes s'y trouv'thont avec yieux: Pîteur Pain et Missis Pain, qui sont dev'nus des persounnages de conséquence dans la littératuthe jerriaise.



Ch'est un sujèt extrèmement d'licat pour un êcrivain de touchi es gens qui proveinnent de l'imagination d'un autre. Les siens qui savent un p'tit mio chein qu'ch'est que d'dêcrithe un type n'aiment pas à vaie chu type-là être dêchithè par un autre individu que l'sien qui l'a mins au jour, et, sus toutes choses, le sien qu'a fait un caractéthe dêteste de l'vaie travesti, changi, hallè hors de li-même.


Un type, même dans l'êcrituthe d'un patouais, est coumme un portrait, - qu'il est bein aîsi de r'counnaître, mais sus tchi qu'i n'faut pas que d'autres êprouvent à douother d'la peintuthe à lus maniéthe. Che s'sait simpl'yement l'moyen de l'gâter et d'vilanner l'oeuvre qu'un autre avait faite avec bein d'la peine et d'l'embarras.


Pourtchi don' alors est-que je m'même de touchi à Pîteur Pain mai? Ch'est parce que des persounnes qu'ont ouï pâler d'li et qu'ont ètou ouï pâler de Dan et d'Missis Dan m'ont d'mandè si nou n'pouorrait pas présenter ches types-là ensembl'ye. L'aventuthe m'a tentè et j'ai voulu l'êprouver. Mais d'vant que d'm'y mettre j'ai 'tè vaie man confrèthe, l'auteur de Pîteur et j'en avons pâlè. Je n'mé r'counnaissai pas l'drouait de touchi à san travâs - sans sa permission. I' m'la donnée avec le pus grand pliaisi - et i' méthite touos mes r'mèrciments. - E.J.L.

No comments: