Monday 23 November 2015

1912: Piteur's report on the meeting

Requiescat'-ous? En 1912, Piteur Pain n'tait pon bein requiescaté, li:

Do you like Latin? I don't know, I've never latted:

Piteur's report on the meeting
Not' preumié reporter est a joué è soudards ès Tchen'vais, qué m'dit Lundi l'Editeu, Lundi matin, l'deuxieme est hors vaie tchès qu'en est d'tout chu cag'tage entouôre le Dispensary, et je n'peux y'allé mé mème viyant qu'ma femme a d'la jlée a faithe et que j'dès résté y'aîdji - ch'est-tan-tchi, Mess Pain, ou n'éthez qu'a allé a l'Assembliée et nos dithe pus tard tchès qu'a 'té èslu Juge.

Mé v'la don que j'prends des crayons et du papi et j'm'en vais au Hall. J'entri justement driéthe le Counnèstabye et les siens qu'estaient déja assis nos dounnites eunne ronde d'applaudissement. J'nos assimes touos les deux, l'Counnèstabye sus la strade et mé sus un banc, un mio l'avant, pour oué cliè ch'qui s'n'allait ètr' dit.

L'Counnèstabye s'mint a lièthe un tas d'papiers sus tchi qu'les Counnèstabyes d'la Camponne avaient èscrit qu'après avé bin r'gardé atouôre de yeux et fouillyi l'Ile dans touôs les coins et jusque dans la Cave, y n'avaient pon trouvé miyeu a proposé coumme Juge que George Philip Crill, du Ho, dans l's envithons d'Saint Cliement. J'tappîmes tous du pi, la d'sus, et man vaîsin qu'il 'tait un djolli good feller et pouorrait montré ès autres Juge a joué ès dominos.

Né v'la Moussieu Gallichan qui s'lève pour nos faithe yun d'ses speech. Y c'menchi par nos liethe les noms des messieux qui restaient caution pour le candidat; et G.P. Crill, s'lon yeux, f'tha un raïde bouon juge. J'nos r'mînmes tous a tappé du pi! Moussieu Gallichan nos dit chiq' eunnes des raisons pour tchi j'éthaimes des raisons pour tchi j'éthaimes grand tort de mantchi eunne si bouonne chance de dounné un fauteuil a Moussieu Crill. Moussieu Crill, qui dit, est Jerriais d'pis la s'melle des bottes jusqu'au coupé du chapé; y fut né à St. Cliement (j'pouôrrais m'trompé ichin, mais v'la tchi n'fait d'rin), ch'fut en Jerriais qui plieuthait quand il avait sé; et jommais n'a sorti l'Ile sans avé grand hate de r'véné. Y'a deja ben d's années qu'il est dans l's'Estats, et, ou n'ètes pas sans vos en etr' apperchus, chaque fais qui pâsle, ch'est pour dithe tchiq'chose. Si j'n'avaîmes pon yeu G.P. Crill dans l's'Estats, s'fit Moussieu Gallichan, en l'vant les bras en haut, djeu sait tchès qui s'ait dév'nu d'nous! Ch'est li qui, ben des fais, criyait "Stop shalloppe!" quand tchiq'un voulait cachi trop vite! Enfin, qu'dit Moussieu Gallichan, s'ou l'noummez Juge, ou pouez vos fié qui vos jug'a coumme y faut, et pas d'hom'bog'thie; y sit pus d'Loué qui n'y'en a dans le livres. Et eunne fais ben séttlé dans san fauteuil, qu'il ajouoti, Moussieu Crill s'en va "Requiescat in pace."

A bon des Saint Martinais qu'etaient là n'savaient pon tchès qu' ch'la voulait dithe; ni mé nintou. Man vaisin s'gratti a tète un mio et dit qué l's autres Juges n'lé lèrraient pon faithe ditet endrét yeux. R'venu siez nous, je d'mandi a Lonôre s'ou'l avait apprins cheunna a l'èscole, mais ou m'dit qu'nou requiescattait pon siez sa maitresse. J'cré tout d'méme, qu'ou dit qu'ch'est d'l'Espagnot pour dithe n'y'a de r'pos que quand nous est mort.

Enfin; nos v'la montés d'un raide bouan Juge; et j'comptons sus Moussieu Crill pour èsmoustillyi ses camarades de la Cour. Chose seuthe qui s'en va y'avé en l'heu des 'speech' et des raffraichissements. J'tach'chai d'ètre par les c'mins. Tout l'monde voudra chatchi d'main ov le nouvieau Majistra; et j'ai dèja oui dithe qu'ils ont idée d'faithe un piqueniq' ès Ecrehos, dans l'Duc, pour lis montré tchi tas d'travas qu'y'a a faithe d'chu bord là.

Piteur Pain
Morning News 26/7/1912

No comments: