Tuesday 23 June 2015

Terreneuve

Né v'chîn l'texte d'aniet d'not' auteu du mais, Jean Sullivan:

Here's today's text by our author of the month, Jean Sullivan:

Terreneuve
Ph'lip s'en va pour Terreneuve,
Ah! Chu pouor chier méguian,
C'hest une asfreuse espreuve,
Pour papa zet moman.
Il éra d'la mouozue,
Des nos et du saumon,
D'la chavette couësue
Et des tours de baston.

Sai-ti bain lus bréviaire?
"Siex jours tu traill'as,
"Le septième à la chivière,
Pour erpos, tu porteras!"
Et quand issa malade,
Il éra pour docteu,
D'la spruche en marmelade,
Pour li donner du coeu!

Quand i voudra faire fête,
Chessa zen bonnet d'gniet;
Noul chas'sa comme une bête,
De jour comme de gniet.
Ah! La pouore bestiole,
Je le plians ma fé bain,
Car souvent en qu'minsole
I grugera san pain.

Il ira zà l'Eglise
Dueux ou trais fais par an,
Ov' la casaque grise
Qu'ly fit l'coësin Bertram.
Oh! Il est bain à pliaindre!
Ch'n'est pas tout rose et flieur.
Mardé, je qu'menche à craindre
Qu'i' crève de mal au coeu.

Nou lus promet miracle
Dans le Run des gliaichons;
Moussieu zest un osracle
Ovec chez chiers garçons.
Ch'est un païs d'cocagne,
Nou lus dit en Gerry;
Mais d'laut' bord nous les ouengne
Sans piqui ni merci.

Au fichard la mouozue,
Les nos et le saumon,
La chavette couësue,
La spruche et le fliaistan!
J'aimme mus la boaunne soupe,
Le podin et l'rouollo,
Que nou za quand nou soupe
Siès l'coësin Jean Drillot.

J'nirai pon à Terreneuve;
Allons au païs d'Or;
C'hest là la terre neuve
Oué nouve trouve un trésor.
Nou r'vain ov unne fortune,
Au roast beef, au podin,
Despenser sa pécunne
Et faire le muscadin!

No comments: