Tuesday 30 June 2015

Guialogue en Patois Gerriais

Né v'chîn l'texte d'aniet d'not' auteu du mais, Jean Sullivan:

Here's today's text by our author of the month, Jean Sullivan:

Guialogue en Patois Gerriais
Entre Me Jean ... et son couësin Ph'lip, à l'endrait du bill pour la réforme de la Cour Royale, présentai au Parliesment Anglais, par M. John Locke, au mais d'Mai, en un mil huit chent séxante quatre.

Mait' Jean

Eh bain Ph'lip man fistaux, quest qu'tout chonchin veux dire;
Tuas sans doute entendu d'chu bill au Parliesment
Ouest qu'tout chenna men'nat, ouest qu'vla qui va condire.
J'en sis tout esfrittai.....

Mait' Ph'lip

Et attends un moment,
Ché n'est que blied en herbe et roz' de tchian flieurie
Chest un Jack de Lantern qui s'sa bétost dans l'iau
Chest un' squall de neuf jours qui s'sa bétost finie,
J'nen ai pon d'poeux ma fé, chest un pouor petit fliau,
Que j'capsiszons bétost.....

Jean

Ne compt' pas sans ten hoste,
Yia longtemps qu' ch'la va mal, et le gouvernement
A paslai bain des fais - et ch'nessa pas sa foste
Si le bill est passai par le grand Parliesment.
Entend mé bain man Ph'lip, je sis d'la vielle escole,
Un Gerrais d'la viell' rocque amouothoeux d'san pays,
J'en sis mesme idolastre et tu sai qu'jen raffole.
Ovec touos ses défauts, oh! j'admire Gerry.
Oh! ma bell' petite isle i faut qu'tu sais parfaite,
Je veux te vais flieurir, et comme un bouan esfant,
Je veux te réformer et te rendre compliète.
Je veux que tout sait fait dans tan vier Parliesment!
Je perdons nouot patois, jabandonnons nouot langue,
Je dev'nons orguilloeux, je régnions nouot gerriais,
Car quand nou z-ouvre l'bec et qu'nou fait une hérangue,
Nou veux se parlochir, nou le fait en angliais!....

Ph'lip

Et ne m'erlourde pas de tan vier rabaschage
Paslons de chu John Lock, chest un angliaischinoeux
Qui voudrait v'nin ichin.

Jean

Assais d't'n embauschage.
Tu n'est chai ni paisson, tuest un vier herquignoeux,
Qu'est qui perdra Gerry? chest bain la langue anglaise,
A chinquante ans d'ichin' nou n'paslla pus un mot
De man bouan vier patois. - Agui langue Gerriaise
Té que j'ai tant aimai depis que j'tais marmot.
Tes fils, tes p'tits esfants, t'ont bain tendu des pièges,
T'ont mins au dergni rang - ah! tu les puniras.
Lus cruel abandon perdra lus privilèges,
I perd'ront tan support, et tu les régnieras,
Tes enmins, Oh! Gerry sont tes esfant ieux mêmes.
Je lus ai souvent dit, en perdant vouot patois.....

Ph'lip

Et tait té vier Saxon! assais de tes embliesmes!
Tues z-un philosophoeux, tues zun drosl' de matois.

Jean

Eh bain erfermons nous, cart les loix d'Jean sans terre,
Ne sont pus de saison; si je ne l'faisons pas
J'y s'sons bétost forchis par la vielle Anglieterre,
Qui bain d'saoeux chu cop la ne nos charlotta pas.

Ph'lip

Tout est bain com'il est, quant à la Cour Rioyale,
Chaeux qu'on disent du ma chest un tas de gronnoeurs;
Tu sai qu'oulle est Gerriaise et purement lioyale.
Ou zen querrais de d'sous t'é-z-et touos tes ronnoeurs.

Jean

Et va douech'ment man Ph'lip ne t'met pon en colère,
Je som' les vrais ammins de nouot petit Islot.
Marchons ovec le temps dans nout petit' galère,
Donnons li d'bouans mat'lots et gardons la z-à fliot;
Quant à nos Magistrats, quest qu'tu veux que j'ten dize,
I nos font de lus mus, chest de bouans sortes d'corps,
Mais i n'sont pon lauyeurs....

Ph'lip

Veux tu que j'te prédize,
Qu'est qui nos advaindra d'un changement - des ermords!
Tu voudrais d'z Avocats sus les banc de Justice.
Et qu'est qui les paiera? f'ront ti mus que cheschin?
I s'sont pus chicangneurs - i s'sont pliains d'artifice.

Jean

Assais de tan gniolin, vé t'en tassieth' ichin,
Bévons un ver' de grog - responds mé sans colère;
V'là z-un banc d'cordongni - tu vai, z-entends tu bain,
Et l'bouanhom' Mait' Ph'lip Rouet et Mait' Jean Cacklalère,
Yun machon, l'aut coblor - touos doeux de Saint-Osain,
Si Mait' Ph'lip d'mande à Jean, de lis faire des bottes,
I dira, j'sis machon, je n'connais rain au cui,
Je gast'tais tan travaux.....

Ph'lip

Tait té tues en ribottes.

Jean

Ah! ah! tuen-es d'un bé, tu vait que te vlà chit.
Di mé - vi'yous franch'ment quest que nou peut attendre
D'un richard, d'un banquir? des Banknot's et de l'or!
Quant à zèt' des Solons - y n'séraient y prétendre,
I nos font de lus mus, pour nouos mettre d'un accord.
Au cordongni - du cuir - au printeur - un' raid' presse,
Au prêtre - un bouan sermon, ès lauyeurs - de bouann' loix,
Au picqpuch' de bouan drap - au changlir - de la graisse,
Chascun en son mesquit - et l'peuple éra ses droits!

Ph'lip

Té, tu voeux minsulter - parc'que tuas liu Barèsme
Et le grand couostumir est nouot bouan Moussi l'Geyt,
Tu crait qu'tues un Solon, et Montesqui li mesme!
Tu n'en sait pon bain long, bel esprit - bel objet!....
J'sis à perdre man temps - mais i faut qu'chla finisse.

Jean

Un fermi n'connaist rain dans le corps de nos lois,
Et pour qu'est qui s'en mesle et pour qu'est qui syimisse
Et qui soigne sa ferm' comme i faisait aut-fois.

Ph'lip

Bail' nous un brin de sno - que le guible t'emporte,
Et - chum - et - chum - fretchum....

Jean

Chen est du reform Clob,
Parfumai za la rose, et v'nu d'la verte porte,
I f'rait danser les r'nards.......

Ph'lip

Ah! chest du reform Glob
Il est com' ieux ma fé, ch'nest pargui pas grand choze,
I voudraient nos taxer les sigars et le sno,
Et l'iau-d'vie et le gin, et même l'iau de roze.
Tout chonna ruinna bain, man chier petit islo;
Je serions les dindons, je paierions la justice,
En fumant, en snoquant, en bévant un lermin.
Ah! chen s'sait la du cop, du vol, de l'injustice.....
Je nos batt'ons pus tost - je le jure-dammin!.....

Jean

Bon, n'en vlà d'zpeusras, sorte de vielle vignole,
Tu vains d'dith' le fin mot, tuas poeux de tes herpins,
Tuas poeux de tes quarquiers, chest pour ch'là qu'tu touosgnole
Tout l'temps au touo du pot - tuas poeux de tes pépins:
Ah! sa z'entend me bain, je sis pour la réforme,
Qui sait faite en Gerry, par nouot' corps des Estats,
Mais i n'faut pas trunser - et qu'ou sait faite en forme,
Gerry s'sa pus heusroeux qu'aucun d'nos p'tits Estats.

Ph'lip

Eh bain je - té comprends, ch'tait faut' de nos entendre,
Que j'avons ieu d'gros mots, - je sis de t'nopignion.
Bévons oquor un cop et si tu veux m'attendre,
Je m'en irai z-ovec té, - tuest un bouan compangn'on.
A ta santai z'houras pour nouotr' petit' Patrie,
Erformons - erformons - et l'Parliesment Angliais
Ne s'meslla pus de nous, i n'en a pon d'envie;
Houras - Houras - bravo - sieyons tréjous Gerriais.

No comments: