Monday 9 February 2015

1915: L's Êtats, l'enrôlement, et l'ivrouongn'nie - The States, signing up, and drunkenness

Un rapport d'la Chronique de Jersey d'eune séance d's Êtats en 1915 - les Membres d's Êtats, les volontaithes pouor la dgèrre, et l's ivrouongnes: trais sujets ou iun? (Lé Caouain n'en 'tait pon convaintchu...)

Here's a Chronique de Jersey report of a States sitting in 1915 - States Members, war volunteers, and drunkards (The Owl seemed to need convincing that they were different subjects...)

Le Chef me dit Lundi matin, la prumié chose, "Caouain, je n'me trouve pas trop bain ches jours, ch'est pourtchi tu t'en vas prendre ma pliaiche à la Chambre des Débats, et tu don'nas un résumé dans t'n articlye d'Samedi de toutes les choses que tu ouïthas et qu'tu verras.

J'étais bain ordgilleux de l'honneur qui m'faisait, alors je m'en fu prendre ma pliaiche parmi les autres journalistes dans la grande salle. Le seul homme présent qu'était peut-être pus ordgilleux qu'mé, était le nouviau huissier.

La Séance quémanchi bain.

Un moussieu haut pliaichi nouos donni des statistiques du nombre de nos Jerriais qu'ont offert lus services au Gouvernement. Il avait êtudié la tchestion dans ses pus moindres détails et nouos donni le nombre d'hommes qu'avaient sorti de chaque bataillon et dans tchi service qu'i' s'étaient enrôlés.

Quand tout fu additionné comme i' faut, nous arrivait à un total de passant treis mille, un magnifique rêsultat. J'étions tous agréablement surprins et parfaitement satisfaits et je décidîmes d'en faithe part ès autorités de la Mère Patrie afin d'lus montrer que not'e petit Jerri n'avait pas hallé driéthe en fait de volontaithes.

Nou ressentait ettou que ch'tait une raîponse êcrasante pour ch't âmice-là qu'avait osé dithe dans un papi Angliais que les Iles de la Manche n'avaient contribué en rain pour la défense de la Patrie.

J'étions justement à êchangi tchiques félicitations sus le patriotisme de nos Jerriais quand je fûmes rappelés assez rudement à l'ordre, et un autre moussieu nouos régali avec une autre collection de statistiques d'un genre tout-à-fait difféthent. A m'suthe qu'il allait, nou s'aperchevait que les physiognomies riantes et joyeuses des membres s'assombrissaient visiblyement, car châque groupe de chiffres nos tchiyait sus la tête comme un coup d'marté.

Ch'tait quâsiment comme si nou nouos avait dit "Le dernié orateur qui vaint d'vos adressi à êprouvé à démontrer qu'ous êtes des gens patriotiques, mais mé je m'en vais vos prouver qu'ous êtes un tas d'ivrouognes!"

Avec la co-opéthation des siens qui lus y connissaient, il avait compilé les statistiques de la quantité d'litcheu que j'avions imbibé toutes ches annees ilo, et fit eune compathaison avec chein qu'avait 'té bu en Angliéterre.

En apprenant qu j'étions de patheils fichus ivrouognes, je rouogîmes tous de honte.

En distchuttant la chose entre nous, j'êprouvîmes à nouos r'consoler un mio avec la pensée que peut-être qu'i' y avait ieu un trompe et qu'ils avaient incliu la proportion qu'avait 'té usité pour faithe de l'ieau d'Cologne, aussi bain comme le "methylated" que je brûlons dans nos "Primus Stoves" pour cauffer not'e café au matin.

Mais iun d'mes collégues me dit que n'y avait pas ieu de trompe du tout, que nos statisticiens étaient presqu' aussi infailliblyes comme le Pape li-même et qu'i' fallait accepter la chose comme correcte.

Je li d'mandi si ch'est qu'i' criyait que la p'tite goutte que j'garde dans m'n armouaithe pour en prendre un p'tit lermin quand j'ai ma à l'estoma, était inclue dans ches chiffres-là, et i' m'raîponni qu'oui, chein qui m'fit tremblier d'peux que je m'en allais être exposé dévant toute l'assembliée. Mais heutheusement man nom ne fut pas mentionné.

Le bon berger dit que ch'tait au Dimanche que l'minchèt s'faisait et que ch'tait scandaleux de vaie les mathes qu'étaient consommées chu jour-là.

Le berger des St. Rébladais, li, vouli oquo êprouver à sauver not'e réputation un mio, et cherchi à mettre toute la bliôme sus les visiteurs, alors je crai, mé, que je dévéthions li en être bain èrconnaissants.

* * * *

Opprès que je fûmes ermins de la sensation que tout chenna avait causé, je nouos occhupîmes des nouviaux régliéments sus les licences.

Nou nuos douni à comprendre qu'à l'avenin je n'pouorrons pas emporter not'e litcheu dans des p'tites boutelles mais qu'i' faudra la baithe sus les prémisses, ou bain si en cas, si j'voulons en emporter, i' n'faudra pas que che s'sait mains d'une pinte et d'mie à la fais.

Certains des membres donnirent lus opinion sus l'sujet, et, grâce à une longue expérience dans les Cours de l'Ile, jugirent qu'i' s'sait peut-être utile de produithe des "pièces de conviction" à l'appui d'lus argûments. Alors l'huissier fu envié cherchi dans un pannyi une collection d'boutelles qu'avaient 'tai trouvés sus des gens qu'avaient 'té emmenés à la station.

Quand il arrivi avec sa pan'naie, v'là tchi causi un vif intéthêt parmi les membres qu'allouognaient tous l'co pour êpier dans l'pannyi.

Iun d'ieux s'mârri et dit "Remportez-mé tout chenna, à tch'est qu'chenna sert de s'en v'nin ichin exhiber toutes ches bûzoquethies-là?"

Je d'mandi à man collègue, "Pourtchi qu'il est si mârri, don?"

"Ah dame! je n'sais pas, d'mandes-li."

"Essait-che par chance qu'il aithait r'connu iune de ches boutelles-là?"

Et là-d'sus man collègue me dit, "Caouain, si tu n'tais pas ta becque, tu té f'thas fliantchi à la porte par le huissier."

Je m'tut.

De vier chinq heuthes i' fu tchestion d'ajourner, mais l'Député de Ste. Bière dit: "Pourtchi pas aver une "Evening Sitting"? Je n'ai pas grand chose à faithe tout chu temps siez-nous, je sommes finis d'mâter."

Mais les autres membres se minrent à gronner.

Iun avait promins à sa femme d'aller avec lyi ès "Pictures."

Un autre s'en allait siez sa belle-méthe faithe une partie d'"Five Hundred," et ainsi d'suite.

Il 'tait bain êvident que je ne séthions pas assez pour faithe un "quorum," ch'est pourtchi je décidîmes de r'mettre l'affaithe au lendemain, et la Séance fut l'vée.

Caouain
4/12/1915

No comments: