Thursday 8 January 2015

Une séthée d'Jerriais à St.-Jean

Né v'chîn l'texte d'aniet d'not' auteu du mais, Elie:

Here's today's text by our author of the month, Elie:

Une séthée d'Jerriais à St.-Jean

L'Objet? Je crai qu'ous en approuv'thez tous;
Ch'est d'faithe avec une pierre deux coups,
D'trouver tchic sous pour nos soudards blièssés,
Et, d'notr' patoïes montrer les qualitès!

Les St.-Jeannais de lus salle poroissiale,
Sont ordgilleurs, car oulle est capitale!
Pour un concert, ou pour une assemblièe,
Oulle est parfaite et qu'oulle est bein meublièe!

Des tchaithes en rangs sont plièchis sus l'plianchais,
Tchaithes de pavis, à dossi, de blianc boiès,
Et les passages qu'ont 'tè laissis d'chaque bord
Sont larges assez pour n'importe tchi corps.

Au ser ètou, la veue qui vos ècliaithe
Est, j'en rêponds, une fameuse belle lumièthe,
Ch'est un bieau gaz, un gaz d'acétylène
Qui n'fume, ni n'sent et qu'ou-z'allume sans peine.

En travaillant, d'lus mus pour nos soudards,
Et nos mat'lots, les dames font bein lus part
Mais tout l'coton et la laine et tout l'fi
Faut bein trouver le moyen d'les payi!

Ch'est pour chouna qu'un tchuthieux assembliage
De vièrs Jerriais, qu'aiment bein lus vièr langage,
Et d'bouannes Jerriaises ont creu l'moment propice
Avec raison, pour offrir lus services.

Et pour aidji à faithe grossi les fonds
Ils attith'thont les sous ov' des chansons,
Des r'citations, et bein d'autre sorte-d'tchi
Yétha du gi! Prépath'ous! Ch'est d'mêtchi!

"J.P." dait y'être ov' papi et crayon,
J'espèthe de ouï ses rimes ercitès ov' apliomb;
La vielle Chronique s'en va y envier "L'Caouan,"
"Monte Cristo" et "Samuel," s'il est bouan.

Mait' "Piteur Pain," qu'est r'venu des tranchies,
Est pour aidji de san mus à "Elie,"
Et un r'venant qui caus'sa des houppades
Ch'est "Bram Bilo," s'i' pathaît sus la strade.

Ch'est, en tchic sorte, un Eisteddfod Jerriais,
Les uns chant'tont avec lus m'illeu vouaix,
L's'autres ercit'tont, un chat'chun à san tou'
Et d'autres, modestes, ne f'thont qu'applaudir tout.

No comments: