Tchi Faithe?

Né v'chîn l'texte d'aniet d'not' auteu du mais, Elie:

Here's today's text by our author of the month, Elie:

Tchi Faithe?

J'ai un couosin qui d'meuthe à Londres, de-d'pis sept ou huit ans,
I' garde, aupi d'un Parc, un Hôtel-Restaurant.
Touos les Sam'dis, réghuliéth'ment, i' s'ouâtchine dans un bain,
Criyant, coumme un Angliais, qu'ch'est divèrsément sain!
L'mais d'Août passè, don, i' s'trouvait à s'savonner tout l'corps,
Dans un coin d'la mansarde, y'où qu'il allait d'amor,
Quand v'la-t-i' pas qu'il entendit un tas d'bri par les c'mins,
Ch'tait l'alarme: "A l'abri; ne r'vechin les Zepp'lins..."
Imagin'ous la situation d'chu malheutheux garçon
Accliutchi dans son bain, tout au haut d'la maison,
Ov' les Zepp'lins qui v'naient bouan rond, escouant d's'obus partout,
Et qu'pour être en seuth'tè, fallait s'sauver sus l'coup
Dans un grand' cave en d'sous d'un store à chent vingt pas d'siex li,
Au bieau mitan d'la ville, en plien jour, un Sam'di!
Pas d'temps à perdre! A tout moment la maison pouvait tchai...
Mais coumme il 'tait, comment filer hors de la vaie?
Tch'est qu'ous éthiez fait à sa plièche? Allons! Chatchun pour sai...
"Tch'est qu'le couosin choësi?" J'l'yai promins qu'je m'taithai!

1917