Chantgni malgré lui

Né v'chîn l'texte d'aniet d'not' auteu du mais, Elie:

Here's today's text by our author of the month, Elie:

Chantgni malgré lui

Ch'tait ma buonne femme qui m'talbâtait
Ou'l tait tréjous à m'embeté.
J'navais pas une minute dé r'pos,
Ou criyait d'pus en pus haut
"I faut qu'tu s'sais Chantgni."

"Jean'ton, Jean'ton, ma chièthe j'veurs pas;
Tu sé bein qu'y'a bein d'l'embarras."
Mais jamais ou' n'changeait d'ton,
Ch'tait tréjous la même chanson
"I faut qu'tu s'sais Chantgni."

Tuos les jours a' la porte ou s'mettait,
Et tuos les siens qu'ou viyait passé
Ch'tait "Entrez, buonnes gens et bévez
A la santé dé m'n'homme car ou savez
I faut qu'i s'sait Chantgni."

Et mé tout l'monde que j'viyais,
Pour mé d'voté j'lus d'fendais,
Mais ma buonne femme mé suivait
Et à tous où lus r'disait:
"I faut qu'i s'sait Chantgni."

Ou m'fit proposé à l'assembliée
La proposition fut s'condée!!
Et à tout l'monde ou d'mandait:
"E'thait'ous la bonté d'voté,
Pour qui s'sait Prumi Chantgni.

Le jour de chute élection,
Jé m'tins siez nous nomme un hanneton,
Au Poll ma femme mé rpré'sentait
Et à tuos les voteurs ou criyait:
"Il faut qu'i s'sait Chantgni."

Ma femme ervins toute fièthe lé sé
"Ah-ça," ou m'dis, "va les convié;
Quoique Prumi tu né s'sais pas v'nu,
J'tavais bein dit: t'en r'souveins tu?
Qu'tu s'sais Chantgni.

A la pièche dé m'n'allé au Poll
J'happi ma vieille par les épaules
Et parce qu'ou m'avait mins Chantgni
Je m'mins d'buon tcheu à la châtchi.
V'la qu'chest dé m'mettre Chantgni

Achteu, tout l'piaisi qué j'en ai
Ch'est quand jé r'veins des quios au sé
J'en trouve souvent à lus pliaindre siez nous
Et i m'insultent si j'fais pas à lus goût.
Chést la' l'sort d'un Chantgni

Souvent du l'yié faut sé r'lévé
A la Station i faut s'n'allé
Traîné tchique ivrogne. Et ma femme dit
Qui ya d'l'honneu et du piaisi
A être Chantgni.
L'criyous?