Monday 10 March 2014

Lé Jour du Commonwealth - Commonwealth Day

Aniet ch'est l'Jour du Commonwealth. Né v'chîn un coupl'ye dé textes d'y'a tchiques ans:
Today is Commonwealth Day. Here are a couple of texts from a few years back:

Lé Commonwealth
Châque année dans l’mais d’Mar, j’célébrons lé jour du Commonwealth. Not’ Reine Élîzabé env’yie un message à touos ses sujets tchi sont membres du Commonwealth. En Jèrri chu message est prîncipalement liu dans l’s êcoles.

Lé Commonwealth a êvolué avaû l’s années et sustout d’pis la deuxième dgèrre. D’vant la dgèrre l’organisâtion était connue comme l’Empire Britannique.

Tch’est qu’ ch’est qué l’Commonwealth?

Preunmiéthement, y’a chînquante trais pays tchi sont membres et tchi r’présentent pus d’un quart de la populâtion du monde. Ches pays sont en Afrique, en Âsie, l’Australie, la Méditerrannée, lé Nord dé l’Améthique, en Ûrope etc. Ch’est vraîment eune fanmil’ye dé nâtions.

Deuxièmement, les objectifs dé l' associâtion sont d’encouothagi les pays dé dêvelopper lus système dé gouvèrnément, obsèrver lé drouait dé l’homme, augmenter lé nivé d’êducâtion and du commèrce et dé combattre lé terrorisme. l’ y’a des rêunions organisées entre les Preunmièrs Minnistres et les êlus pour distchuter des sujets de grand’ împortance à lus peupl’ye.

Les Chefs dé gouvèrnément se rêunissent touos les deux ans et l’année pâssée la rêunion eut lieu à l’Île de Malte. Chutte rêunion fût précédée par eune rêunion dé membres êlus des p’tits pays, et lé Sénateu Paul Routier était lé r’présentant dé Jèrri.

Bein seux, y’a des douzaines d’organisâtions au nivé du Commonwealth, încliu lé CPA (Commonwealth Parliamentary Association) dé tchi qu’ j’avons 'té hardi acti comme membres d’s Êtats. Étout, j’sis seux qu’ou connaîssez l’organisâtion sportif tchi organise les jeux du Commonwealth (Commonwealth Games). Ches organisâtions valent la peine dé supporter et dé dithe à tout l’monde qué la paix est lé seul av’nîn pouor touos nous.

Ch’t’ année, lé jour du Commonwealth est lundi lé treize dé Mar et l’message dé la Reine sétha publié chu jour-là et j’espéthe tch'i' s’sa împrînmé par la gâzette.

Jean Le Maistre

Lé Jour du Commonwealth
J’fus hardi chanceux, y’a deux-trais ans, d’aller en Afrique. Ma femme ‘tait ieune des politiciens d’Jèrri à eune rêunion en Namibie d’l’Associâtion Parlémentaithe du Commonwealth. Nou sait bein qué l’ Commonwealth est eune associâtion d'pays, des grands et des p’tits, tchi travâlent ensembl’ye pouor amender la vie d’ses habitants – et y’en a pus d’1.8 billion - et pouor aîdgi à êtablyi la paix partout l’monde. La mâjorité dé ches gens n’ont pon les richesses qué j’ jouissons ichîn en Jèrri, mais ch’est p’t-être seulement en y allant qu’nou peut vraîment comprendre l’innêgalité tch'i' y’a entre les habitants des pays du Commonwealth. I’ y’en a tant tchi n’ont pon assez à mangi, ni d'habits, ni d’l’ieau à béthe. L’êducâtion est hardi împortante, mais i’ y’a septante chîn millions d'êfants tchi n’ont pon l’opporteunité d’être êdutchis. Lé Commonwealth peut donner l’espéthance des changements à touos ses habitants.

Pour touos les pays, lé Jour du Commonwealth est eune opporteunité d’célébrer lus lians l’s iuns auve l’s autres, et l’deuxième Lundi du mais d’Mar fut chouaîsi pour les célébrâtions viyant qu’la mâjorité d’s êcoles partout l’monde sont en allant à chutte date-là. Châque année i’ y a des difféthents thèmes, et en 2005 ch'est “L’ Êducâtion – Faithe d’s Opporteunités, Réaliser l’ Potentiel” tch’a ‘té chouaîsi. Dans nos êcoles, l’s êfants peuvent faithe tchiquechose dé spécial pouor l’mèrtchi, et i’ s’en vont ouï eune lettre env’yée par not Duc, la Reine.

Bouôn Jour du Commonwealth à tout l’monde!

Tony Scott Warren

No comments: