Thursday 28 November 2013

1964: George d'La Forge a des mémouaithes du Pallion

Lé Pallion

En Améthique,
lé 22 d'mai, 1964


Moussieu l'Rédacteu.

Quand i' m'enn'yie au sé et qu'mes pensées sont d'Jèrri, j'èrgarde souvent les bulletîns d'L'Assembliée d'Jèrriais. V'la tch'i' m'rappréche dé ma janneche, car j'vai tréjous tchiquechose dans châque bulletîn tchi m'ramémouaithe la vie dans les vièrs temps. L'aut' sé, liêsant "Tchiques mots souos la lettre 'P'" à la page 520 du neunmétho 34, j'viyais la description par lé fanmeux Fraînque Le Maistre du mot "Pallion", tch'est, en êffet, un lieu d'rencontre des gens d'un vaîthinné.

Comme j'vouos l'disais dans ma lettre du 17 d'avri, les jannes hommes d'à l'entou lus rencontraient sus l'Pallion ès Landes à St. Ouën quand j'tais mousse. Y'a eune septantaine d'années, la maiethon appelée "Moreland", tch'est au su du Pallion, et tch'y touche, n'tait pon 'couo bâtie et nou pouvait marchi tout l'tou du Pallion. Man papa (tchi mouothit en 1903) m'dîsait tréjous quand nou passait par là qu'chutte maiethon-là avait couôté chent louis à bâti, clié dans la grand' porte! Chent louis 'tait un tas d'sou dans chu temps-là!

Y'avait tréjous eune dgaîngue dé gas au Pallion: Man p'pèe, m'n oncl'ye Ouinn'teur, Ph'lippe Powell, George Steuber, Darri L'Corni, Charlot Vibert d'la Ville la Bas, le p'tit George l'Mèrquand tchi cliopinnait (il avait eune gambe pus courte qu'l'autre), un Cornu d'La Landelle, Franço L'Cornu (l'parrain d'man fréthe Fraînque), san fréthe Dardinne, Fraînque Coutanche, Ph'lippe Hubert, les Vibert des Palliéthes, Freddo Maugi fis Jean, deux-s'trais gas d'L'Êta et acouo d'autres qué lus noms m'èrveinnent à l'idée d'temps en temps quand j'sis à reunminner à man tout seu. I' lus assiévaient sus l'hèrbe à bailli d'lus bec, et nou viyait l's anciens passer en lus en allant s'assiéthe au haut du Mont du Valet en d'ssu d'L'Êta. Y'en avait hardi dans chu temps-là tchi pâssaient l'Dînmanche l'arlévée là. Ch'est eune belle veue - ieune des pus belles dé Jèrri - et nou viyait les cârosses aller et v'nîn - y'en avait à quat' chévaux - à l'Hôtel dé L'Êta.

Sus l'Pallion, quand les garçons v'naient enn'yés d'parlochi, i' jouaient à toutes sortes d'jeux, tchiquefais au Tireli et à Saute Mouton, et tchiquefais il' avaient des courses pour vaie l'tché tchi pouvait couôre lé pus vite. M'n oncl'ye Ouinn'teur, tchèrpentchi d'vocâtion et un mio forgeux à forche d'vaie Papa et man p'pèe en travas dans la forge siez nous, fit et apportit eune pathe dé gailloches au Pallion. Auve chutte pathe-là comme patron, l's autres en fîdrent étout - pus ou mains bein - et pour tchiques Dînmanches l'arlévée nou n'viyait qu'des gas sus gailloches, et ch'tait au chein tchi marchéthait auve les pus hautes! M'n oncl'ye avait veu un manniéthe dé pièrrot ès courses tchi marchait sus eune pathe tchi 'tait si haute tch'il 'tait au nivé des gens assis dans des ouagonnettes, et ch'tait ch'la tchi y'avait donné l'idée d'en faithe.

Ch'tait à ch't êpoque-là, étout, qu'les machinnes à pédaller tch'avaient eune grand' rouelle en d'vant et eune toute pétite en driéthe - l's Angliais l'appelaient "Penny-Farthing" - fîdrent appathence en Jèrri. Ch'tait bein aîsi d'tchulbuter par dessus les manchelles viyant tch'il' taient pliaichies drait sus l'haut d'la grand' rouelle. I' n'y avait qu'à taper eune pièrre auve la p'tite reue en driéthe pour la faithe sauter en l'air, et né v'la l'cycliste sus san nez dans la route! M'n oncl'ye Ouinn'teur n'avait pon d'sou pour en acater ieune, ch'est-en-tchi il en fit ieune dans la forge, et lé v'la arrivé d'ssus au Pallion l'préchain Dînmanche! Tout l'monde voulait l'êprouver, et sans doute i' iut un tas d'tchulbutes à c'menchi, mais i' n'lus prîns pon bein d's heuthes à apprandre à manier la machinne. D'vant longtemps eune démi-douzaine en acatîdrent ieune, et il' 'taient tous à pédaller l'tou du Pallion toute l'arlévée. Y'en avait tchi pouvaient faithe toutes sortes d'gymnastiques atout ches machinnes-là, même aller quédaine auve lus pids et lus mains sus les manchelles. M'n oncl'ye pouvait mett' un mouochet dans la route et lé l'ver sans d'valler d'sa machinne. Quand y'avait des tchulbutes y'avait des juthements en même temps!

Quand les soudards (les rédguliers) v'naient tither au blianc ès Landes, deux-s'trais d'ieux v'naient tchiesfais au Pallion et êprouvaient à lus motchi des garçons en Angliais, criyant tch'i' n'les comprannaient pon. Ch'est vrai tch'i' n'y avait pon fort dé gens tchi pâlaient l'Angliais - comme j'l'ai mentionné d'vant - mais les gas en savaient assez d'mots pour dévinner tch'il' 'taient à lus fichi d'ieux et i' iut tchiques bouannes bastaures! Les soudards tchittaient bein vite à badrer les garçons quand i' v'naient à dêcouvri qu'un gris-ventre n'avait pon d'peux d'lus fichi un co-d'poing dans l'nez, et qu'eune rouoge câsaque né l's êffritait pon! J'pense bein tch'i' n'avaient pon rêalisé qué les gas sus l'Pallion n'taient pon des bûsards, et tch'i' m'ttaient des rouoges câsaques ieux-mêmes quand il' allaient drîlyi dans la Milice, chutte même Milice Rouoyale tch'aîdgit à gangni la Batâlle dé Jèrri!

George d'La Forge

No comments: