Sunday 22 September 2013

Actes, Chapitre 16, vèrsets 9-15

Acts of the Apostles Chapter 16-8 (Bible Illustrations by Sweet Media)Et Paul rêvit duthant la niet: v'là tchi vînt un houmme Macédouainien lî d'mander, "Vé-t-en en Macédouaine à seule fîn d'nos aîdgi." Et auprès chu rêve-là, j'décidînmes dêliêment d'aller en Macédouaine, viyant qu'i' nos sembliait cèrtain qu'lé Bouôn Dgieu nos avait env'yé lus donner la bouonne nouvelle. Épis don j'vailînmes drait d'Troas en Samothrace et l'jour d'auprès à Néapolis, et d'ilo à Ph'lippîn tch'est la preunmié ville d'la Macédouaine et eune colonnie Romaine, et j'restînmes là tchiques journées. Et au Sabat j'nos en feûnmes hors la ville, auprès d'la riviéthe où'est qué j'criyêmes qu'i' y'éthait un endrait d'priéthe, et j'nos assiévînmes et pâlînmes auve les femmes y rassembliées. Et ieune dé ches femmes tch'avait nom Lydia, eune marchande dé pourpre matéthiel d'la ville dé Thyatithe et fidèle au Bouôn Dgieu, nos êcoutit. Lé Seigneu li'ouvrit l'tchoeu à seule fîn d'èrmèrtchi chein qu'Paul dîthait. Et quand oulle avait 'té bâptîsie auve sa fanmil'ye, ou nos d'mandit, "S'ou criyiz qué j'sis fidèle au Seigneu, entrez siez mé et restez." Et ou nos pèrsuadit.

No comments: