Monday 30 April 2012

Priéthes pouor lé Sèrvice Annuel 2012


La Collecte du jour

Péthe tout-puissant, tchi d'ta mînséthicorde fis heutheux les discipl'yes en viyant l'Seigneur résuscité; donne-nous la connaîssance d'sa présence auve nous, qué j'sommes fortifié et souôt'nu par sa vie levée et qu'j'vos sèrvons sans fîn en sainteté et en véthité ; Par Jésû Christ tan Fis not' Seigneu, tch'est en vie et tchi règne auve té dans l'eunité du Saint Êsprit, un Dgieu, aniet et à janmais.

Amen

Priéthe pouor la Reine not' Duc

Dgieu du temps et dé l'êternité, dé tchi tan fis règne pas comme maître mais comme sèrviteu, jé t'donnons èrmérciements et louanges qu'ous avez bêni not' île, la nâtion, les Rouoyaumes et les tèrritouaithes auve Lîzabé, not' glorieuse Reine et Duc bein-aimée. Dans ch't' année d'jubilé, donne-lyi tes dons d'amour et d'jouaie et d'paix tandi qu'ou continnue à t'obéi en fouai, san Seigneur et Dgieu, et dans san sèrvice fidèle à ses pays et gens, et ès cheins du Commonwealth, achteu et touos les jours d'sa vie; par Jésû Christ not' Seigneur
Amen


Priéthe pour not' île

Seigneur,

J'prions pouor not' belle île dé Jèrri -

Pouor Moussieu l'Bailli, l'Lieut'nant Gouvèrneu, l'Chef Minnistre et san Conseil d'Minnistres; pouor touos les Senateurs et les Députés.
Dans nos pâraîsses, les Connêtabl'yes et lus officièrs, pouor touos les cheins tchi sont en autorité ichîn.

Pouor l'Douoyen, les Recteurs et éspecialement pouor l'Révérend Poulton et Pére Nick dé St. Pièrre et pouor les cheins auve la résponsabilité pouor m'ner l's aut's dénominnâtions dans l'Île..

Pouor nos fanmil'yes ichîn et ailleurs.

J'savons qué j'sommes bein chanceurs d'vivre dans eune telle pliaiche.
Aigue-nous à garder Jèrri belle pouor les généthâtions à v'nîn.

J'prions par l'nom d'Jèsû Christ


Amen

Bénédiction

Qué l'Christ rêsuscité nos donne la jouaie d'la vie êtérnelle.

Amen

No comments: