Wednesday 7 March 2012

Du Solyi - Apple layer pie

Du Solyi ou du Pâté à Solyi

Né v'chîn la r'chette d'un fanmeux pliat Jèrriais:-
  • 2 livres d'pâte,
  • ½ livre d'beurre,
  • ½ livre d'chucre
  • et des pommes suthes en quartelles.
Mettre eune couoche dé pâte au fond d'eune lachefraie, pis eune couoche dé pommes et d'chucre: dèrché eune couoche dé pâte, et couoche dé pommes et chucre par-dessus ch'la, atout finnalement eune dreine couoche dé pâte. Tchuithe douochement un coupl'ye d'heuthes.

Et pis n'en v'chin eune autre èrchette dé chent ans:
"Les solièrs sé faisaient dans ches înmenses grands pliats en tèrrerie. Nou mettait eune êpaisseu d'pâte et ieune dé tranches dé poummes poudrée d'chucre, et pis nou continnuait d'même jusqu'au haut du pliat. La dreine êpaîsseu, bein seux, 'tait d'pâte. Nou-s-avait autant d'couoches comme nou voulait. Nou tchuîsait ch'la au grand fou à fouangner."

En fîn d'compte, ch'est bein sîmpl'ye à faithe, car ch'est:

"Couoche dé pâte, couoche dé pommes, couoche dé pâte, couoche dé pommes et couoche dé pâte par-dessus, et v'là un solyi!"

Et mé tchi vouos l'dis - j'vouos affie qu'ch'est bouon!

Bouan appétit!

Par excellence, touos ches bouons fricots tch'ont tréjous 'té les spécialités d'Jèrri – des gâches à fouaie, des bourdélots faits auve du sud rom'thi, du pâté à solyi, des crêpes, des nouozeles ou god'nitchettes, des croquesingnoles, des mèrvelles, des galettes à vrai, du simné, d'la gâche à lait su, du pâté d'rhubarbe, gâche à crétons, nièr beurre, des pais au fou et des fêves, du pouothé bouoilli, patates fricachies, des colfrites, des bênis, des pihangnes, du lanchon, des champngnons fricachis, du podîn d'Noué, d'la g'lée d'mouaithes, d'l'ieau d'cannelle, du noyau, du pré, d'la biéthe dé spruche, et cétéra, et cétéra.
Lé grand r'pas du sé s'faîthait sus eune rouelle dé boeu (nou d'bitait la rouelle atout lé "grand couté a viande", d'eune londgeu d'vîngt-chinq pouces, l'aleunmelle étant d'dgiex-huit pouces atout un manche dé sept pouces. J'pense qué l'seul tchi reste dans l'Île au jour d'aniet, un couté d'eune chentaine d'années, est l'chein qué j'présentis et qu'j'avons au Musée d'Agritchultuthe à La Hougue Bie), et dèrché du lard, et du podîn d'flieu, podîn d'fruit, podîn d'riz ou autres podins, ou du pâté d'pommes ou pâté à solyi.
Et la tabllye, coumme oulle 'tait chergie, un pot de pais au fou, tchuits avec des piots; un pâté au solyi, des bourdélots et d'la gâche, et I s'y mintes tous de bouan tcheur.

No comments: