Wednesday 9 March 2011

Nânnîn au p'tun - No Smoking Day

Aniet ch'est la Journée contre lé p'tun.
It's No Smoking Day.

Lé p'tun

Les cigarettes sont taxées bein dû à seule fîn dé dêcouothagi les gens d'feunmer pa'ce qué ch'est bein mauvais pouor la santé - la santé du feunmeux ou d'la feunmeuse et pouor les cheins à l'entou étout. I' n'est pon pliaîsant d'pâsser eune séthée dans eune atmosphéthe enfuntchie!
P'tunn'-ous?
Ch'est en tchi d'pis l'2 d'Janvyi nou n'est d'aut' pèrmîns en Jèrri d'feunmer dans des pliaiches couèrtes où'est qu'nou travâle. Les feunmâtcheurs éthont achteu à aller hors mais i' daivent lus mêfier en prannant lus pliaîsièrs à p'tun car lé Connêtabl'ye dé St Hélyi a dgèrni qu'i' faut pon laîssi tchaie des buts d'cigarettes dans les rues d'la Ville.
Tchi feunmée!
En pâlant d'feunm'thie, av'-ous janmais pensé à la richesse dé nouot' langue Jèrriaise? La feunm'thie nouos donne un tas d'fanmeux mots. Par exempl'ye, lé mot "feunmâtchais" veurt dithe d'la feunmé tchi s'êcappe du feu et feunmâque l'appartènement. En entrant d'dans, nou dithait: "Ch'n'est qu' feunmâtchais ichîn - ourvrez don les f'nêtres!" Lé mot "feunmâtchi" veurt dithe feunmer hardi et faithe un tas d'feunmée. Dans un cas d'même nou pouôrrait dithe : "Ch'est bein malsain, qué d'feunmâtchi tant!" Et quand un appartènement est pliein d'feunmée d'même, nou dit: "Tout est enfuntchi 'chîn d'dans, nou n'y vait rein!" Le mot "feunmâtcheux" veurt dithe un homme tchi feunme continuellement et sans arrêt. Dé li, nou dithait: "Ch'est un vièr feunmâtcheux tchi sent à p'tun!"
La Cigarette
Ou z'enfumâtchis les gens,
Tout n'est qu'fumée par dedans,
Et ch'est la "spittoon" tout l'temps:
Ov votr' Cigarette!
Quand j'y pense...
Pus tard, Lé Mathais fut la pliaiche où'est qu' j'apprîns qué la feunm'thie 'tait eune mauvaise habitude. A ch't heu, j'savons bein qu'ch'est eune habitude bein dangereuse pour les poumons. Ch'tait l'occâsion du thée d'l'êcole. Moussieu Harry James Carter, un homme bein sévéthe tchi nouos donnait la baïette comme peunnition ordinnaithe, 'tait maître d'l'êcole. J'avions c'menchi à feunmer, man fréthe Fraînque et mé, comme un tas d'aut' mousses à l'êcole. Enn'yé d'jouer auve les autres, J'alleunmis eune cigarette et mé v'là a la feunmer en plieine veue d'tout l'monde. Lé maître lé vit et m'fît env'yer la cigaretté bas et l'êgliami, atout l'talon d'man sou'yier e't m'dît dé m'présenter prés dé s'n êcritouaithe à l'êcole lé lendemain au matîn. Comme peunnition j'fus nommé le piéthe malfaiteu d'l'êcole lé lendemain, et peunni acouo eune fais pus tard quand Frainque fut attrapé à feunmer étout. Étant l'grand des deux fréthes j'tais responsabl'ye pour li.

No comments: