Tuesday 12 October 2010

Les Nouvelles Chroniques du Don Balleine 2011

Les thèmes pouor les préchains neunméthos des Nouvelles Chroniques du Don Balleine en 2011: ché s'sa l'"histouaithe" au R'nouvé, épis "duthant la niet" à la Saint Jean, l's "êlections" à la Saint Miché, et les "dgiêx mots" à Noué.

L'histouaithe: ch'est l'1100e annivèrsaithe d'la fondâtion du Duché d'Nouormandie. Bein seu qu'j'éthons du Wace, mais y'a 1100 ans à couvri entre chu temps-là et l'jour d'aniet! Idées: des bâtisses historiques, des châtchieaux, des vîsites à des pliaiches historiques, des camps d'batâle, des clâsses d'histouaithe à l'êcole...

Duthant la niet, ou les rêves et l'dormi: nou-s'est au liet, nou dort (ou ofûche nou n'peut pon dormi), nou rêve, nou ronfl'ye... Où'est qu'nou dort? Tch'est qu'est la pliaiche la pus extraordinnaithe qu'nou-s'a pâssé la niet? Racontez-nous vos rêves! Ou înmaginnez un rêve fantastique! Av'-ous 'té rêvilyis par des brits, d's avathies, ou autcheune aut' chose?

L's êlections et la politique: ch'est la saîson d's êlections. J'avons un tas d'descriptions d's êlections au temps pâssé, mais en av'-ous des mémouaithes? Av'-ous voté tchiquebord hors Jèrri? Coumme tchi amender l's êlections? Tchi qui s'sait l'candidat idéal?

Les dgiêx mots: acouo eune fais, not' calenge populaithe d'êcrithie. Nou propose eune liste dé dgiêx mots, et i' faut faithe sèrvi touos les dgiêx mots dans un texte - eune histouaithe, eune poésie, un rapport, eune description... sus autchun thème, mais i' faut faithe sèrvi touos les dgiêx mots!

No comments: